بسم الله الرحمن الرحيم
«إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ»
(Сураи Ҳуҷурот, ояти 10)
“Бешак, мӯъминон бародаронанд, пас байни бародаронатон оштӣ биёред.”
Бо ибтикори ин ояти муборак, ки падидаи ваҳдат, бародарӣ ва дӯстии покро таъкид мекунад, ман аз номи худамам ва аз номи Созмони Ҷавонон барои Эҳёи Тоҷикистон ҳамаи мусалмонони ҷаҳон, ҳамватанони гиромӣ ва мардуми сарбаланди Тоҷикистони азизро ба муносибати иди саиди Қурбон самимона табрик мегӯем. Имрӯз, ки кишвари мо ва ҷомеаи ҷаҳонӣ бо мушкилоту душвориҳои сиёсиву иҷтимоӣ рӯбарӯ аст, бештар зарур аст, ки мо дар атрофи арзишҳои исломӣ, ваҳдат ва иттиҳоди мусалмононро таҳким бахшем ва аз ҳар гуна тақсимоти дохилӣ, махсусан дар сафи аҳзоби сиёсӣ, парҳез кунем. Иттиҳод ва ҳамдигарфаҳмӣ, бар пояи ишқ ба Худо ва меҳру рафоқат миёни бародарон, асоси устувории ҷомеа ва пешрафти миллат мебошад.
Иди Қурбон яке аз бузургтарин ва муқаддастарин иди мусулмонон аст, ки рамзи фидокорӣ, эҳсон, сабру таҳаммул ва итоат ба фармони Парвардигор мебошад. Ин ид ифодаи муҳаббати ҳақиқӣ ба Худованд ва омодагӣ ба қурбони ҳама чизи дунёвӣ барои ризоияти Ӯ мебошад. Он ба мо ёдрас мекунад, ки имон ва ихлос асоси ҳамаи некиҳо ва бунёдкорӣ мебошанд.
Дар ин рӯзҳои муқаддас, мо ҷавонон, ҳамчун насли умедбахши миллат, бо эҳтироми хос ба арзишҳои исломӣ ва суннатҳои неки ниёгон, аҳд мекунем, ки барои рушди Ватан, таҳкими ваҳдат, густариши маънавиёт ва эҳёи арзишҳои динӣ ва миллӣ ҳамеша талош хоҳем кард. Мо ба нақши дини мубини Ислом ҳамчун нерӯи созанда ва муттаҳидкунанда эътиқод дорем ва ба дӯстӣ, сабру таҳаммул ва хайру саховат арҷ мегузорем.
Иди Қурбон фурсати муҷаддади мурури виҷдон, ёрии маънавӣ ва моддӣ ба ниёзмандон ва густариши фазои меҳру муҳаббат дар ҷомеа мебошад. Бигзор ин иди муборак барои ҳар як хонадони тоҷик файзу баракат биёрад ва бо осоишу оромиш, нияти пок ва нуру саодат, фазои муҳаббат ва ҳамдигарфаҳмиро афзун намояд!
Бо умеди он ки фазои орому осуда ва сулҳу суботи кишвари азизамон таҳким ёбад, ҷавонон пайваста дар роҳи созандагиву ватандорӣ ва эҳёи суннатҳои волои Ислом гомҳои устувор мегузоранд, боз як бор ҳамаи шуморо ба иди Қурбон табрик гуфта, ба ҳар кадоми шумо тандурустӣ, бахти сафед, файзу баракат ва ризқи ҳалол таманно менамоем!
Иди Қурбон муборак бошад, ҳамватанони азиз!
Бо эҳтиром,
Созмони Ҷавонон барои Эҳёи Тоҷикистон
